,,Þetta hefur gerst ansi fljótt. Maður bjóst kannski ekki við að koma svona hratt inn í þetta. Þetta er kannski smá óvænt," sagði Jón Daði en frammistaða hans hefur vakið verðskuldaða athygli.

,,Það kemur meiri athygli þegar maður er að spila á stóra sviðinu en maður passar sig að hugsa ekki of mikið út í það. Maður heldur sér á jörðinni og nýtur þess að spila fótbolta."

Jón Daði hefur ekki náð sama dampi með Viking í Noregi og með landsliðinu. ,,Þetta hefur verið erfitt tímabil hjá liðinu í heild sinni. Persónulega finnst mér ég hafa spilað vel en ég veit að ég get fengið miklu meira út úr mínu spili. Vonandi breytist það á næsta tímabili."

Jón Daði segist ekki vera farinn að íhuga að yfirgefa herbúðir Viking. ,,Ég er ekki að hugsa út í það eins og er. Ég á eitt ár eftir af samningi mínum. Ég er kominn með nýtt samningstilboð og maður tekur sér tíma í að skoða þau mál."

,,Þessi tvö landsliðs verkefni eru eftir og síðan er frí. Kannski kemur eitthvað upp á borðið og kannski ekki. Ef ekki þá er maður glaður að vera í Viking," sagði Jón Daði en frammistaða hans gegn Hollendingum í síðasta mánuði vakti mikla athygli.

,,Magnús Agnar umboðsmaður minn hefur sagt að það sé einhver áhugi en ég er ekkert að pæla í því og láta það trufla mig. Ég ætla að klára þessa skemmtilegu landsleiki og vonandi nær maður að spila vel þar."

Hér að ofan má sjá viðtalið í heild sinni.