Íslendingar og Norður Írar léku í dag seinni vináttulandsleik sinn í Kórnum á þremur dögum. Íslendingar unnu fyrri leikinn með einu marki gegn engu og gerðu nokkrar breytingar á byrjunarliðinu frá fyrri leiknum. Leiknum lauk með, eins og þeim fyrri, með 1-0 sigri Íslands.
Fyrsta færið fengu Íslendingar á 7. mínútu þegar Máni Hilmarsson komst á auðan sjó en gestirnir björguðu naumlega. Bæði lið fengu ágætis færi í upphafi leiksins.
Eina mark leiksins kom á 31. mínútu eftir góða sókn íslenska liðsins þar sem boltinn gekk af vinstri kanti yfir til hægri þar sem Erlingur Agnarsson, leikmaður Víkings, setti boltann af yfirvegun í netið. Kolbeinn Birgir Finnsson með stoðsendingu.
Þetta reyndist eina mark fyrir hálfleiks þar sem íslenska liðið var nokkuð sterkari aðilinn.
Seinni hálfleikurinn var heldur tíðindalítill, sérstaklega framan af og liðin gáfu fá færi af sér. Gestirnir freistuðu þess að færa sig framar á völlinn en náðu ekki að ógna marki íslensku strákanna að neinu ráði. Það voru því íslensku strákarnir sem fögnuðu öðrum sigri gegn Norður Írum.
U17 er að búa sig undir milliriðil fyrir EM sem leikinn verður í Rússlandi í mars. Auk heimamanna eru Austurríki og Wales í riðli með Íslandi.
Halldór Björnsson, þjálfari U17 landsliðsins, fór í viðtal sem má sjá í spilaranum hér að ofan. Fyrir neðan má svo sjá viðtal við fyrirliðann í dag, Birki Val Jónsson, af SportTv sem sýndi leikinn beint.
Byrjunarlið Íslands í dag:
Andri Þór Grétarsson (m)
Alfons Sampsted
Ísak Atli Kristjánsson
Birkir Valur Jónsson (f)
Axel Óskar Andrésson
Kolbeinn Birgir Finnsson
Máni Austmann Hilmarsson
Jón Dagur Þorsteinsson
Erlingur Agnarsson
Ægir Jarl Jónasson
Dagur Austmann Hilmarsson
Athugasemdir