Pétur Georg Markan.
Pétur Georg Markan, leikmaður BÍ/Bolungarvíkur, hefur tekið sæti á Alþingi. Pétur er þriðji varaþingmaður Samfylkingarinnar í Reykjavíkurkjördæmi norður. Mörður Árnason fékk leyfi frá störfum í vikunni og Pétur hefur nú tekið sæti hans.
,,Þetta fer afskaplega vel með fótboltanum. Það er margt líkt með boltanum og þinginu," sagði Pétur við Fótbolta.net í dag.
,,Ég hef alla tíð verið viðrinn pólitík meðfram fótboltanum. Ég hef tekið þátt í starfi ungra jafnaðarmanna og ég var í háskólapólitíkinni þar sem ég var framkvæmdastjóri Röskvu."
Pétur starfar á Vestfjörðum sem kennari og framkvæmdastjóri HSV. Hann mun nú dvelja á höfuðborgarsvæðinu að minnsta kosti fram á föstudag þegar þingi á að ljúka. Á meðan æfir hann með nokkrum leikmönnum BÍ/Bolungarvíkur á höfuðborgarsvæðinu.
,,Ég var á æfingu í gær með sameiginlegum æfingahópi KA, Víkingi Ólafsvík og BÍ/Bolungarvík. Það lið myndi sóma sér vel ef allir myndu spila saman."
Pétur hefur ákveðið að bjóða sig ekki fram til alþingiskosninga í vor. ,,Ég ákvað að gefa þessu frí eftir þetta kjörtímabil. Ég ætla að sjá svo til hvernig málin þróast. Ég á örugglega eftir að stíga meira inn á þennan vettvang," sagði Pétur að lokum.
Athugasemdir
