Ef liðböndin eru sködduð er oftast reiknað með tveggja til þriggja mánaða fjarveru. Þá er Gylfi kominn í kapphlaup við tímann til að verða klár fyrir HM. Ísland mætir Argentínu í fyrsta leik á HM þann 16. júní. Rúmar þrettán vikur eru í þann leik eða 96 dagar.

Ef liðböndin eru slitin er ólíklegt að Gylfi spili á HM. Í allra besta falli yrði Gylfi þá frá í þrjá mánuði en í versta falli þyrfti hann að fara í aðgerð sem þýðir sex til níu mánaða fjarvera.

„Ég trúi því ekki að þetta sé slitið miðað við spiltíma og áverkann á myndbandinu. Hné verður verður svo óstöðugt við algjört slit að maður á ekki að geta spilað áfram," sagði Einar Óli við Fótbolta.net í dag.

Einar Óli segir að möguleiki sé á að utanverður liðþófi hafi skaddast eða um sé að ræða tognun á utanverðu liðbandi.

„Ef það er matið hjá sjúkraþjálfurum og læknum Everton að meiðslin séu alvarleg þá þykir mér líklegast að utanverður liðþófi hafi eitthvað skaddast eða þetta sé tognun á utanverðu liðbandi. Sér í lagi ef meiðslin gerast þegar hann er að gefa þessa utanfótar sendingu."

„Þá kemur snúningur á hnéð sem getur valdið skaða á liðþófanum. En þá þarf líklega aðgerð og hann verður frá keppni í u.þ.b 8 vikur, það fer þó eftir alvarleika skaðans."

„Miðað við myndbandið af atvikinu og þá staðreynd að hann meiðist á 23. mínútu og klárar leikinn segir mér að alvarleg meiðsli á utanvert liðband sé ólíklegra en ella."

Smelltu hér til að sjá Gylfa meiðast í leiknum um helgina