Gustavo Poyet, knattspyrnustjóri Sunderland á Englandi, var ekkert sérlega ánægður eftir 0-1 tap liðsins gegn Everton eins og gefur að skilja en hann segir þetta vera sögu liðsins á tímabilinu.
Sjálfsmark Wes Brown á 75. mínútu skildi liðin að en Everton komst með sigrinum í fjórða sæti deildarinnar á meðan Sunderland er á botninum þegar fjórar umferðir eru eftir og stefnir allt í að liðið spili í næst efstu deild á næsta tímabili.
,,Þetta hefur verið okkar saga á þessu tímabili. Við erum aftur að spila vel í leiknum og í leik sem var mjög jafn og svo töpum við honum með sjálfsmarki," sagði Poyet.
,,Þeir eru heppnir í eitt augnablik og það skildi liðin að en kannski er þetta munurinn á því að vera á toppnum og að vera á botninum. Stundum ganga hlutir með manni þegar liðinu gengur vel en því miður þá var okkur ekki ætlað að fara með stig úr þessum leik," sagði hann að lokum.
Athugasemdir