Fjórir dagar eru í að Ísland mæti Argentínu í fyrsta leik á HM. Varnarmaðurinn Kári Árnason segir að íslenska liðið verði að ná að halda betri spilamennsku út allan leikinn heldur en í vináttuleikjunum gegn Gana og Noregi.
„Við verðum að vera 100%. Við höfum sýnt það í æfingaleikjunum að þegar við slökum á þá erum við ekki nógu góðir," sagði Kári í viðtali fyrir æfingu liðsins í dag.
„Við verðum að vera 100%. Við höfum sýnt það í æfingaleikjunum að þegar við slökum á þá erum við ekki nógu góðir," sagði Kári í viðtali fyrir æfingu liðsins í dag.
„Þegar við vorum 100% gegn Gana þá völtuðum við yfir þá en síðan slökum við á og föllum of langt frá þeim í seinni hálfleik. Þá erum við í veseni og það má ekki gerast. Við erum búnir að fara yfir þetta allt. Við vorum með góðan fund um það í gær hvað má betur fara."
Í leiknum gegn Argentínu beinast sjónir margra að Lionel Messi en íslenksu varnarmennirnir fá verðugt verkefni þegar þeir mæta honum.
„Við höfum rætt á fundum að ef við myndum vita leynitrix til að stoppa hann þá værum við sennilega á einhverjum öðrum stað í fótboltanum. Á sínum degi er ekkert hægt að stoppa hann en við erum með ýmsar hugmyndir hvernig við ætlum að vinna þetta. Það verður síðan að koma í ljós hvort það gangi upp."
Athygli vakti gegn Gana þegar Kári tók langt innkast undir lok leiksins. Kári er vanari því að vera inni í teig að skalla boltann eftir innköstin en hann tók langt innkast gegn Gana þar sem Aron Einar Gunnarsson og Hörður Björgvin Magnússon voru ekki inni á vellinum.
„Ég hef notað þetta með félagsliðum en er aðeins farinn í öxlinni eftir að hafa gert þetta aðeins of mikið á tímabili. Það er ánægjulegt að ég geti farið í þetta hlutverk ef við þurfum þess," sagði Kári.
Hér að ofan má sjá viðtalið í heild sinni.
Athugasemdir