Hughes er 54 ára en hann spilaði fyrir Southampton milli 1998 og 2000. Reiknað er með því að tryggir aðstoðarmenn hans í gegnum árin, Mark Bowen og Eddie Niedzwiecki, fylgi honum til Southampton.

Næsti leikur liðsins verður gegn Wigan í 8-liða úrslitum enska bikarsins á sunnudaginn. Svo verður leikið gegn West Ham þann 31. mars en Southampton hefur átta umferðir til að halda sér í deildinni.

Dýrlingarnir eru aðeins stigi fyrir ofan fallsæti.

Pellegrino þurfti að taka pokann sinn eftir að ná aðeins að landa einum sigri í síðustu sautján leikjum. Southampton vildi stjóra með reynslu úr ensku úrvalsdeildinni.

Southampton yrði sjötta félagið í ensku úrvalsdeildinni sem Hughes myndi stýra. Hann er fyrrum stjóri Blackburn, Manchester City, Fulham, Queens Park Rangers og Stoke.

Hann stýrði Stoke í níunda sæti ensku deildarinnar þrjú tímabil í röð áður en liðið hafnaði í 13. sæti í fyrra. Þá fékk hann hrós fyrir að gera leikstíl Stoke áhorfendavænni.

Matt Le Tissier, Southampton goðsögn, segir að það eigi að vera forgangsatriði að bæta leikstíl liðsins.

„Það þarf að gera liðið sóknarsinnaðra og beinskeyttra. Það hefur verið of mikið um að halda boltanum án þess að ógna andstæðingnum. Það þarf að spila með tvo frammi, allt tímabilið hefur liðið bara leikið með einn fremstan og það hafa ekki skapast nægilega mörg færi til að vinna fótboltaleiki," segir Le Tissier.