Heimild: Goal.com/it
Ítalska úrvalsdeildarliðið Lazio hefur áhuga á að hefja viðræður við hollenska liðið Heerenveen um kaup á landsliðsframherjanum Alfreði Finnbogasyni. Þetta fullyrðir ítalska útgáfa Goal.com á vefsíðu sinni í dag.
Samkvæmt fréttinni mun Alfreð vera einn fimm leikmanna sem forráðamenn Lazio geri sér vonir um að krækja í á komandi vikum en Igli Tare, yfirmaður knattspyrnumála hjá félaginu, er sagður mjög hrifinn af markanefi leikmannsins.
Hins vegar gæti leynst ásteytingarsteinn í komandi viðræðum félaganna um kaupverð leikmannsins því Lazio er sagt tilbúið að reiða fram fjórar milljónir evra en forráðamenn Heerenveen meti verðmæti Alfreðs á rúmar sjö milljónir evra.
Alfreð skoraði 24 mörk í 31 deildarleik með Heerenveen á síðasta keppnistímabili og eru mörg lið á meginlandi Evrópu sem og í Bretlandi með hann undir smásjánni um þessar mundir.
Líklegt má telja að hann yfirgefi herbúðir Heerenveen í sumar.
