Lestu um leikinn: ÍBV 0 -  1 Valur

Rasmus Christiansen fótbrotnaði í leiknum og varð öllum á vellinum, hvort sem menn voru í takkaskóm eða uppi í stúku, verulega brugðið. „Ég veit ekkert. Hann var bara sendur suður með flugvél og hann er illa farinn. Þetta var ógeðslegt en þetta gerist stundum í fótbolta. Ásetningurinn er enginn, þetta er algjört óviljaverk og því miður þá gerist þetta og er þetta partur af leiknum. En Rasmus kemur sterkur til baka. Við töluðum um það í hálfleik að fara út í seinni hálfleikinn og vinna hann fyrir Rasmus!

Leikurinn var ekki sá fjörugasti og var Óli sammála því. „Mér fannst nánast ekkert gerast í þessum leik. Hann var rólegur og hægur. Mér fannst hann mjög skemmtilegur, við unnum hann 1-0! En það var ekki mikið að gerast í honum.“

Björn Daníel Sverrisson hefur æft með Val að undanförnu og hafði Óli sínar skýringar á því. „Nú eru atvinnumenn á landinu og þeir æfa með hinum og þessum liðum. En það er ekki þar með sagt að þeir séu að skipta um félag. En það er rétt. Þeir hafa komið 2-3 atvinnumenn á æfingar hjá okkur. Hann er ekki að koma í Val. Hann er samningsbundinn í Danmörku. Það er gaman fyrir alla að fá að vera með Val. Jafnvel fyrir ykkur gæti það verið gaman,“ sagði Óli glaður í bragði.