Guðni Bergsson, formaður KSÍ, segir að stefnt sé á að heiðra Eið Smára Guðjohnsen með einhverjum hætti. Til greina kemur meðal annars að Eiður spili sérstakan kveðjuleik á Laugardalsvelli.
„Við munum örugglega skoða hvað er hægt að gera honum til heiðurs, hvað svo sem það verður. Ég er með opinn huga gagnvart því. Við sjáum hvað setur. Við viljum heiðra hann með eftirminnilegum hætti," sagð Guðni við Fótbolta.net í dag.
„Hann er búinn að vera okkar þekktasti leikmaður og mögulega okkar besti leikmaður í knattspyrnusögunni. Hann er einn af 2-3 sem koma þar upp í hugann. Hann hefur afrekað svo margt að hann yrði vel að því kominn að við gerðum eitthvað flott fyrir hann hér á Laugardalsvelli."
Eiður tilkynnti í síðustu viku að hann ætli að leggja skóna á hilluna, 38 ára að aldri. Eiður er markahæsti landsliðsmaðurinn í sögu Íslands.
„Að vinna alla þessa titla með félögum eins og Chelsea og Barcelona var stórkostlegur árangur."
„Með landsliðinu var hann burðarás og besti leikmaður í fleiri ár og jafnvel áratugi. Hann hefur átt þvílíkan feril og getur sáttur litið um öxl og verið stoltur af því hvað hann hefur afrekað," sagði Guðni.
Hér að ofan má sjá viðtalið við Guðna í heild.
Athugasemdir
