Íslenska kvennalandsliðið gerði 1-1 jafntefli við það pólska í vináttuleik sem fram fór ytra í dag.

Andrea Rún Hauksdóttir kom Íslandi yfir á níundu mínútu en forystan entist stutt því heimakonur jöfnuðu átta mínútum síðar.

Fleiri urðu mörkin ekki en ekki var um opinberan leikdag að ræða og því var íslenski hópurinn einungis skipaður leikmönnum úr Pepsi-deildinni.

Næsta stóra verkefni landsliðsins er leikur gegn Hvít-Rússum í undankeppni EM en hann fer fram í Hvíta-Rússlandi þann 12.apríl næstkomandi.