Í morgun vaknaði forseti Pescara, Daniele Sebastiani, við mikinn hvell í innkeyrslunni við heimili sitt. Bíllinn hans stóð í ljósum logum eftir að hafa verið sprengdur upp.

Talið er að skemmdarvargurinn komi úr hópi stuðningsmanna Pescara sem hefur mótmælt forsetanum og liðinu á tímabilinu.

Harðkjarna stuðningsmenn Pescara mættu með borða með áletruninni „Skammist ykkar!" þegar leikmenn liðsins mættu á jólakvöldverð fyrir áramót. Slegið og sparkað var í bíla leikmanna og starfsliðsins. Heimtað var að jólakvöldverðinum yrði aflýst því það var ekkert til að fagna.

Sebastiani hefur viðurkennt að hann hafi íhugað að stíga úr forsetastólnum en mikil óánægja er með ákvarðanir hans í leikmannamálum. Sérstaklega hefur varnarleikurinn verið höfuðverkur en Pescara hefur fengið 55 mörk á sig.