Afturelding bar sigurorðið af Þrótti Vogum í B-deild Lengjubikarsins í Mosfellsbæ á þessu miðvikudagskvöldi.

Afturelding byrjaði vel og komst í 2-0 með tveimur mörkum frá Alexanderi Aroni Davorssyni, sem var einmitt spilandi aðstoðarþjálfari hjá Þrótturum í fyrra.

Þróttarar svöruðu vel og voru búnir að jafna fyrir hlé í 2-2. Þegar komið var fram í miðjan seinni hálfleikinn var staðan breytt, gestirnir í Þrótti komnir yfir og í 4-2.

En Afturelding gafst ekki upp og nokkrum mínútum síðar var staðan aftur orðin jöfn, 4-4.

Elvar Ingi Vignisson jafnaði fyrir Aftureldingu úr vítaspyrnu en hann gerði svo sigurmarkið, einnig úr vítaspyrnu og flott endurkoma Aftureldingar staðreynd í kaflaskiptum leik. Ragnar Þór Gunnarsson, framherji Þróttar, fékk sitt annað gula spjald á 73. mínútu.

Lokatölur 5-4 í fjörugum leik í Mosfellsbæ í kvöld. Þetta var annar sigur Mosfellinga í Lengjubikarnum og er liðið nú á toppi riðils 3 í B-deildinni. Þróttur Vogum hefur einnig unnið tvo leiki en liðið hefur leikið einum leik meira en Afturelding.