Bakvörðurinn Hjörtur Logi Valgarðsson er kominn á fulla ferð í boltanum eftir að hafa skipt yfir í norska úrvalsdeildarfélagið Sogndal. Hjörtur Logi var hjá Gautaborg í Svíþjóð en var úti í kuldanum þar.
„Það var búið að vera ljóst í nokkurn tíma að ég myndi skipta um lið enda fékk ég ekki mikinn spiltíma á síðasta tímabili. Það var spurning hvort ég myndi færa mig um set í Svíþjóð eða finna nýtt land. Sogndal kom upp og mér leist strax vel á það," sagði Hjörtur Logi í útvarpsþættinum Fótbolti.net á laugardag.
Jonas Olsson er þjálfari Sogndal og fékk Íslendinginn til liðsins.
„Hann var þjálfari Gautaborgar fyrsta tímabilið mitt. Hann fékk mig til Gautaborgar og þannig þekki ég hann."
„Það var ekki skemmtilegt að fá svona lítið að spila í Svíþjóð en ég vissi það fyrirfram að ég myndi ekki fá mikinn spiltíma. Ég átti ágætis samband við þjálfarann en ég hélt mér samt í góðu standi og reyndi alltaf að vera tilbúinn. Þrátt fyrir að vera ekki mikið að spila hélt ég mér gangandi líkamlega og andlega"
„Fyrst og fremst er markmið Sogndal að halda sér í deildinni. Þetta er líklega minnsti klúbburinn í úrvalsdeildinni en það er vel haldið um allt og þeir reyna að vera eins faglegir og þeir geta. Okkur gekk vel á undirbúningstímabilinu og við bjuggum þannig til væntingar,"
Nú þegar Hjörtur Logi er byrjaður að spila á fullu setur hann stefnuna á að komast í landsliðshópinn fyrir undankeppni EM. Hann kann vel við sig í Sogndal þrátt fyrir að bærinn sé eiginlega bara stærri útgáfa af Reyðarfirði.
„Þetta er mjög rólegur bær og maður getur sett fókusinn á fótboltann og að hanga með strákunum. Það er ekki mikið annað að gera þarna. Hingað til hefur þetta samt verið mjög fínt," sagði Hjörtur Logi en viðtalið má heyra í heild í spilaranum hér að ofan.
Athugasemdir