Hlynur Svan Eiríksson, þjálfari Breiðabliks í Pepsi-deild kvenna, var að vonum ánægður með sigurinn á Völsurum í kvöld, 1-0.
,,Ég er svo sannarlega í skýjunum með þennan sigur, hrikalega flottur sigur, þvílíkur karakter í þessum stelpum. Þær eru æðislegar," sagði Hlynur Svan í kvöld.
,,Við breyttum liðsuppstillingu og fjölguðum aðeins til baka og Valsliðið kom okkur þannig séð ekkert á óvart. Þær ógnuðu okkur þá sérlega með stungum inn fyrir í fyrri hálfleik, við hefðum getað verið skynsamari og stigið þær út en þær voru að sleppa í gegn þarna þrisvar sinnum og þar var Birna alveg meiriháttar í markinu og hélt okkur á fótum í fyrri hálfleik."
,,Þetta 8-1 tap skipti akkurat engu máli og allt annað lið sem spilaði í dag. Það er Íslandsmótið sem telur. Ég tel okkur eiga helling inni og þetta er bara byrjunin, við ætlum okkur að vera í toppbaráttunni. Við erum búin að tala um það og setja okkur það markmið að vera af alvöru í þessu," sagði Hlynur Svan Eiríksson í kvöld.
Hægt er að sjá viðtalið hér að ofan í heild sinni.
