Gylfi ákvað að fara ekki með Swansea í æfingaferð til Bandaríkjanna í gærmorgun. Swansea sagði í yfirlýsingu í gær að Gylfi hefði ekki talið sig vera með rétta hugarfarið til að fara í ferðina vegna óvissunar sem er í gangi.

„Við erum vonsviknir með að Gylfi hafi tekið þá ákvörðun að fara ekki með liðsfélögum sínum til Ameríku þar sem liðið er að vinna ásamt þjálfaraliðinu í undirbúningi fyrir komandi tímabil," sagði í yfirlýsingu frá Kaplan og Levien.

Eigendurnir skutu einnig skotum á Everton um að félagið hafi rætt ólöglega við Gylfa.

„Í augnablikinu höfum við ekki fengið neitt tilboð sem við teljum endurspegla sanngjarnt verð fyrir Gylfa þar sem hann er mjög mikilvægur fyrir okkar félag."

„Eins og við höfum greint frá þá látum við ekki neyða okkur í að samþykkja tilboð fyrr en eitthvað félag borgar uppsett verð okkar fyrir leikmanninn. Þá skiptir engu máli hvort félagið telji að það hafi náð samkomulagi við leikmanninn. Slíkt samkomulag væri augljóslega brot á reglum ensku úrvalsdeildarinnar."

„Við berum ómælda virðingu fyrir Gylfa sem persónu og leikmanni og erum vongóðir um að hann muni endurskoða ákvörðun sína og koma til móts við liðsfélaga sína í æfingaferðinni."