FH-liðið tapaði stórt í kvöld í Garðabænum. 6-0 tap gegn Stjörnunni og annar skellurinn í tveimur umferðum hjá FH sem eru í erfiðri stöðu í 8. sæti Pepsi-deildarinnar.
Þórður Jensson þjálfari FH var ekki ánægður með spilamennsku síns liðs, skiljanlega. Hann var ósáttur með hversu auðveld mörk Stjörnunnar voru í leiknum.
Þórður Jensson þjálfari FH var ekki ánægður með spilamennsku síns liðs, skiljanlega. Hann var ósáttur með hversu auðveld mörk Stjörnunnar voru í leiknum.
,,Spilamennskan var ekki eins góð og ég vonaðist til. Við fáum mark á okkur snemma sem breytir skipulaginu og riðlar því sem við lögðum upp með. Það hefur stór áhrif. Við lögðum upp með að reyna halda og láta Stjörnuna stjórna leiknum en við gáfum þeim of auðveld mörk, hlutur sem þær þurfa ekkert á að halda. Ég er svekktur yfir því hversu ódýr mörk Stjarnan fékk," sagði Þórður.
Undirritaður reyndi eftir bestu getu að sjá það í leiknum, hvenær FH náði einni sendingu á milli inn á vallarhelming Stjörnunnar í leiknum. Ég er ekki að ljúga að neinum, þegar ég segi það að FH náði því í fyrsta skipti á 53. mínútu leiksins. Þórður viðurkennir að sóknarleikurinn hafi ekki verið upp á marga fiska hjá liðinu í kvöld, enda hafi áherslan verið á varnarleiknum.
,,Takmarkið var að halda varnarlega séð og beita skyndisóknum. Það var ekki að takast ég viðurkenni það. Hvort það hafi verið 50. mínútu eða fimmtu, ég veit ekki alveg með það. Við erum búnar að vera í vandræðum með framherjana. Við ætluðum að fá til okkar erlenda leikmenn sem gekk ekki upp. Síðan missum við leikmenn í skóla í Bandaríkjunum og Hanna fer erlendis. Það hefur verið leikmannavelta sem er vissulega áhyggjuefni. Við verðum að vinna með þann mannskap sem við erum með og reyna nota það."
FH-liðið heldur áfram að dragast nær botninum. Afturelding á leik gegn Þór/KA annað kvöld og með sigri þar, geta þær komist upp fyrir FH og sent FH-liðið í fallsæti.
,,Ég get lítið sagt um það sem Afturelding er að gera, nema það að þær fengu gám af leikmönnum. Það er annað mál. Við þurfum að hugsa um okkur og reyna ná í úrslit. Það eru ennþá 15 stig í pottinum. Við þurfum ekki að vinna þá alla. Við þurfum bara að vera fyrir ofan neðstu tvö liðin og það er takmarkið," sagði Þórður Jensson þjálfari FH.
Viðtalið í heild sinni er hægt að sjá í sjónvarpinu hér að ofan.
Athugasemdir