Eftir fjóra tapleiki í röð tókst Grindvíkingum loksins að knýja fram sigur en liðið vann ÍA, 3-2 í kvöld. Gunnar Þorsteinsson, fyrirliði Grindvíkinga var að vonum sáttur með sigurinn.

„Þetta var ansi ljúft. Eftir hörmungina síðustu fjóra leiki og öll þessi færi sem við fengum í þessum leik þá fannst mér við eiga þetta fyllilega skilið og gott að byrja að grafa okkur upp úr þessari holu sem við vorum komnir í," sagði Gunnar.

Grindavík hefði hæglega getað skorað tvö, jafnvel þrjú mörk í fyrri hálfleik en svo snemma í seinni hálfleik lentu þeir undir. Þá fór aðeins um Gunnar.

„Ég hugsaði bara „jæja nú getum við bara pakkað saman". Nei nei. Ef Andri hefði klikkað úr fyrra vítinu hefðum við kannski gert það. Þetta er bara einkennandi fyrir þennan hóp."

Juanma, spænski framherji Grindavíkur átti ótrúlega innkomu í kvöld. Hann fiskaði víti, skoraði og fékk rautt spjald.

„Hann er frá Miðjarðarhafinu og spilar af ástríðu. Hann er búinn að vera mikið meiddur kallinn og maður sá bara gleðina þegar hann skoraði. Hann er svo rosalega ástríðufullur og gleymir sér aðeins í hita leiksins. Bæði að fara úr að ofan, hann er reyndar þvílíkur skrokkur, skil hann mjög vel. Ég myndi líka gera þetta ef ég væri í svona góðu formi."

Grindvíkingar sýndu mikinn karakter í kvöld en liðið lenti tvisvar sinnum undir gegn ÍA en kom í bæði skiptin til baka og sigraði leikinn.

„Það sáu það allir sem horfðu á þennan leik að við breyttum ekki neinu. Héldum okkar planið og héldum áfram að skapa færi."

Grindvíkingar settu upp markmið fyrir tímabil að ná 22 stigum og þá myndu þeir sleppa við fall. Markmiðið náðist loksins í kvöld eftir fjóra tapleiki í röð.

„Það hefur aldrei gerst í 12 liða deild að lið falli með 24 stig. Nú geta allir í kringum okkur hætt að tala um eitthvað fall. Nú getum við horft fram á veginn og einbeitt okkur að næsta markmiði sem er að gera betur en Grindavík hefur nokkurn tímann áður gert í Pepsi-deild."