Wayne Rooney, framherji Manchester United, er nú kominn með jafn mörg mörk í ensku úrvalsdeildinni og Arsenal-goðsögnin Thierry Henry.
Rooney kom United í 3-0 gegn Queens Park Rangers í dag og hefur nú skorað 175 mörk í ensku úrvalsdeildinni, líkt og Henry gerði.
Það tók Rooney að vísu 377 leiki til að ná þessum markafjölda á meðan Henry gerði það í einungis 258 leikjum.
Rooney er nú ásamt Henry í þriðja sæti yfir markahæstu menn allra tíma í ensku úrvalsdeildinni og þarf hann bara 13 mörk til að fara upp fyrir Andy Cole og í annað sætið.
Hann er þó enn 85 mörkum á eftir goðsögninni Alan Shearer sem skoraði 260 mörk í 441 leik.
Athugasemdir