Þorri Geir Rúnarsson, miðjumaður Stjörnunnar, mun spila sinn fyrsta leik með U21 árs landsliðinu þegar það mætir Dönum í umspili um sæti á EM eftir tæpan klukkutíma.

Þorri kemur inn í liðið frá því í fyrri leiknum líkt og Hjörtur Hermannsson varnarmaður PSV Eindhoven sem var ekki með vegna meiðsla í Álaborg. Kristján Gauti Emilsson er aftur á móti ennþá frá vegna meiðsla.

Hörður Björgvin Magnússon tekur út leikbann í dag og Hjörtur mun væntanlega taka stöðu hans í vinstri bakverði. Þá fer Emil Atlason á bekkinn frá því í fyrri leiknum en Þorri Geir kemur inn fyrir hann. Möguleiki er á að stillt verði upp í 4-5-1 í dag en ekki 4-4-2.

Hjá Dönum kemur Jores Okore varnarmaður Aston Villa inn í liðið en hann var ekki með í fyrri leiknum þar sem hann var í A-landsliðs hópnum gegn Albaníu.

Leikurinn á Laugardalsvelli hefst klukkan 16:15 og er miðaverð 1500 krónur. Frítt inn fyrir ellilífeyrisþega, öryrkja og börn 16 ára og yngri.

Smelltu hér til að sjá textalýsingu