U21 árs landslið Íslands gerði í dag 1-1 jafntefli U21 árs landslið Danmerkur í síðari leik í umspili um sæti á EM sem fer fram í Tékklandi næsta sumar. Þetta þýðir að íslenska liðið er úr leik eftir hetjulega baráttu.
Einkunnir Íslands:
Frederik Albert Schram 9
Hann var magnaður í dag. Rúnar Alex Rúnarsson var tæpur fyrir leikinn og gat því ekki verið með en Frederik kom inn í byrjunarliðið og sýndi hvað í honum býr. Öruggur í sínum aðgerðum og átti nokkrar frábærar markvörslur.
Orri Sigurður Ómarsson 8
Hann var feykilega öruggur í bakverðinum. Hann var að glíma við bæði hlaupin hjá Scholz sem og Danny Amankwaa. Tveir mjög flottir leikir hjá honum í umspilinu.
Sverrir Ingi Ingason 7
Sverrir stýrði varnarleiknum mjög vel og agað. Hann átti slæma hreinsun í fyrri hálfleik en var annars mjög öruggur í sínum aðgerðum. Það verður gaman að sjá hann í A-landsliðinu í komandi framtíð.
Brynjar Gauti Guðjónsson 8
Spilaði í miðverðinum með Sverri. Virkilega flottur í dag, tók skynsamlegar ákvarðnir og fín frammistaða.
Hjörtur Hermannsson 7
Hjörtur kom til baka úr meiðslum í tak og tók stöðu Harðar sem var í leikbanni. Hann átti góðan dag í bakverðinum og var öruggur, öflugur varnarlega. Virkilega spennandi leikmaður fyrir framtíðina.
Arnór Ingvi Traustason 7
Hann var öruggur á boltann og með góðar sendingar. Hann getur ekki kvartað yfir sinni frammistöðu þessi öflugur miðjumaður Norrköping.
Þorri Geir Rúnarsson 7
Hann var virkilega flottur í þessum leik. Kom inn í liðið með mikið sjálfstraust og átti varla feilsendingu. Flottur leikur hjá Þorra.
Guðmundur Þórarinsson 6
Hann var ekki líkur sjálfum sér í fyrri hálfleik og átti slakar sendingar. Leikur hans var þó töluvert betri í þeim síðari og var öruggið uppmálað á miðjunni.
Andri Rafn Yeoman 6
Hann gerði það sem hann átti að gera. Hann hljóp úr sér líftóruna og var frammistaða hans yfir heildina mjög fín.
Ólafur Karl Finsen 6
Óli Kalli var þokkalegur í dag. Hann skoraði í síðari hálfleik eftir fyrirgjöf Orra en dómarinn dæmdi á einhvern ótrúlegan hátt markið af, fáránleg dómgæsla. Hann getur þó gengið frá þessum leik sáttur.
Hólmbert Aron Friðjónsson 7
Hann var að eiga við tvo svakalega miðverði. Hann átti í basli með þá og virtist vera haltrandi á vellinum. Hann hefur spilað betur en það má þó taka það fram að Ísland var að spila varnarsinnað með skyndisóknir í huga. Hann skoraði úr vítinu sem jafnaði leikinn, gó spyrna hjá honum.
Athugasemdir