Ísland er í 18. sæti á nýjum heimslista FIFA sem var kynntur í dag. Ísland hoppar upp um tvö sæti frá því í janúar og hefur aldrei í sögunni verið jafn ofarlega á heimslistanum!

Fyrra met Íslands á listanum var 19. sæti í fyrra. Engir landsleikir hafa verið undanfarnar vikur en í útreikningum á listanum núna þurrkast út úrslit fyrir nokkrum árum. Því hoppar Ísland upp um tvö sæti.

Ísland fer upp fyrir Sviþjóð og Wales á listanum. Ísland er núna í öðru sæti yfir Norðurlandaþjóðir en Danir eru í 12. sæti listans.

Af liðunum sem Ísland mætir á HM í sumar er Argentína í 4. sæti listans, Króatía er í 15. sæti og Nígería í 52. sæti.

Í næsta mánuði leikur Ísland vináttuleiki við Mexíkó (17. sæti) og Perú (11. sæti) en báðir leikirnir fara fram í Bandaríkjunum.