Ísland er í 18. sæti á nýjum heimslista FIFA sem var kynntur í dag. Um er að ræða sama sæti og í síðasta mánuði en Ísland hefur aldrei farið ofar en 18. sæti á listanum.

Af liðunum sem Ísland mætir á HM í sumar er Argentína í 4. sæti listans, Króatía er í 15. sæti og Nígería í 52. sæti.

Í næstu og þarnæstu viku leikur Ísland vináttuleiki við Mexíkó (17. sæti) og Perú (11. sæti) en báðir leikirnir fara fram í Bandaríkjunum. Hópurinn fyrir þá leiki verður opinberaður á morgun.