Þorvaldur Örlygsson, þjálfari HK í fyrstu deild karla, var ánægður með 2-1 sigur liðsins á ÍA í Kórnum í kvöld.
Axel Kári Vignisson kom HK-ingum yfir með þrumufleyg áður en Guðmundur Atli Steinþórsson bætti við öðru í byrjun síðari hálfleiks. Garðar Bergmann Gunnlaugsson minnkaði muninn en lengra komst ÍA ekki.
,,Allir sigrar eru mikilvægir. Leikurinn var þokkalegur af okkar hálfu, sérstaklega í fyrri hálfleik. Við vorum að spila vel og komumst í góða stöðu, í 2-0 stöðunni í seinni hálfleik fannst mér við geta náð ró og klaufalegt mark sem við fáum á okkur en það mátti svosem búast við því," sagði Þorvaldur við Fótbolta.net.
,,Þetta er mjög jafnt og deildin hefur sýnt það í sumar að það er margt sem getur skeð og mörg lið sem búist var við að ná góðum árangri en þau hafa ekki náð þeim árangri sem vænst var og önnur lið hafa komið á óvart og komið deildinni í uppnám."
Guðmundur Magnússon fór úr Kórnum með sjúkrabíl eftir að hafa lent í tæklingu þar sem boltinn var á milli.
,,Hann lendir í tæklingu, boltinn á milli og fer beint í legginn á honum. Við vitum ekki hversu alvarlegt þetta er. Ég á ekki von á því að þetta sé brot, við bíðum eftir myndatöku en ég efast um það," sagði hann að lokum.
Athugasemdir