Varnarmaðurinn Brynjar Gauti Guðjónsson er að öllum líkindum á förum frá ÍBV en samningur hans við félagið rennur út um áramótin.
,,Það er kominn tími á að prófa eitthvað nýtt og ég ætla fyrst og fremst að reyna að komast út," sagði Brynjar Gauti við Fótbolta.net í dag.
Brynjar Gauti spilaði báða leikina með U21 árs landsliðinu gegn Dönum í umspili um sæti á EM og hann segist hafa heyrt af áhuga erlendis.
,,Maður hefur heyrt af áhuga og það eru lið að fylgjast með. Verkefnið með U21 var að klárast í gærkvöldi og það skýrist kannski betur í vikunni hvað er í boði."
Hinn 22 ára gamli Brynjar Gauti hefur einnig verið orðaður við Stjörnuna en hann segist ekkert hafa ákveðið hvað tekur við ef hann fer ekki út í atvinnumennsku.
,,Ég er ekkert búinn að ákveða hvað ég geri ef ég verð áfram á Íslandi," sagði Brynjar Gauti.
Brynjar Gauti var að ljúka sínu fjórða tímabili með ÍBV en hann er uppalinn hjá Víkingi á Ólafsvík.
Athugasemdir