Heimir Hallgrímsson tilkynnti í dag landsliðshópinn fyrir komandi vináttuleiki gegn Indónesíu dagana 10 og 14. janúar. Ekki er um alþjóðlega leikdaga að ræða og því er landsliðshópurinn mikið breyttur.

Fjórir nýliðar eru í hópnum en það eru Hilmar Árni Halldórsson, Felix Örn Friðriksson, Samúel Kári Friðjónsson og Mikael Anderson. Auk þess á Anton Ari Einarsson ekki landsleik að baki en hann hefur verið áður í hópnum.

Indónesía er að undirbúa sig fyrir Asíuleikana á næsta ári þar sem U23 ára lið keppa. Líklegt er að U23 ára liðið spili fyrri leikinn gegn Íslandi en seinna liðið verði blanda úr aðalliðinu úr U23 ára liðinu.

Leikirnir fara fram á aðalleikvangi Indónesíu sem tekur 88 þúsund manns í sæti.