Hollenski framherjinn Geoffrey Castillion spilaði sinn fyrsta leik með FH um síðustu helgi þegar liðið gerði 1-1 jafntefli við Grindavík í Fótbolta.net mótinu. Geoffrey komst strax á blað hjá FH en hann skoraði mark liðsins í leiknum.
„Það er alltaf gott að skora í fyrsta leik og ég vonast til að skora mörg mörk til viðbótar með FH," sagði Geoffrey í viðtali við Fótbolta.net í dag.
Geoffrey skoraði ellefu mörk í sextán leikjum í Pepsi-deildinni með Víkingi R. á síðasta tímabili. Hann ræddi við nokkur félög í Pepsi-deildinni eftir tímabilið en ákvað á endanum að ganga í raðir FH.
„Það voru nokkrir möguleikar fyrir mig en ég tel að það sé gott fyrir mig að spila annað tímabil á Íslandi. Ég vonast til að sleppa við meiðsli núna og ná heilu tímabili."
Geoffrey segir að það hafi verið erfið ákvörðun að fara frá Víkingi eftir eitt tímabil.
„Félagið var mjög gott fyrir mig. Það gaf mér tækifæri til að spila hér á Íslandi og það var erfitt að fara frá þeim en ég tel að þetta sé besta skrefið fyrir mig."
Geoffrey líkar vel við hörkuna í Pepsi-deildinni. „Þetta er góð deild. Það er mikið af líkamlegri baráttu en ég er stór og get höndlað það. Það eru nokkur góð lið í þessari deild."
FH endaði í 3. sæti í Pepsi-deildinni síðastliðið sumar en stefnan er sett hærra á komandi tímabili.
„Aðalmarkmiðið er að vinna deildina. Við spilum líka í Evrópukeppni og sjáum hvernig þetta gengur. Það er langt undirbúningstímabil framundan og við sjáum hvernig þetta fer."
Hér að ofan má sjá viðtalið í heild sinni.
Athugasemdir
