Leiknir og Fjölnir áttust við í miklum markaleik í Lengjubikarnum í kvöld en Grafarvogsliðið vann 5-2.
„Tölurnar ljúga ekki og við fengum á okkur fimm mörk. Við gáfum fjögur, ef ekki öll fimm, á silfurfati. Við erum að tapa boltanum of auðveldlega og þeir eru góðir í að refsa," sagði Brynjar Hlöðversson, fyrirliði Leiknis.
Leikurinn var gríðarlega opinn og mörkin hefðu getað orðið mun fleiri.
„Eins og Gæi (Garðar Gunnar aðstoðarþjálfari) sagði við okkur þá hefði þetta getað endað 7-7. Við þurfum að nýta færin og fá færri mörk á okkur, þetta er ekki flókið!"
„Þetta hefur verið upp og niður hjá okkur á undirbúningstímabilinu en við erum að læra betur á hvor aðra og erum að læra á Kristó þjálfara. Við erum alltaf að þéttast og ég er mjög jákvæður."
Þegar Brynjar var spurður að því hvort hann teldi að Leiknir gæti blandað sér í toppbaráttu Inkasso-deildarinnar í sumar svaraði hann samstundis játandi.
„Auðvitað er það stefnan. Það eru fimm til sex lið sem ætla sér upp um deild, þetta verður hörkudeild sem ég hlakka til að takast á við."
Athugasemdir