Barcelona og Real Madrid mætast í úrslitaleik spænska konungsbikarsins klukkan 19:30 í kvöld. Leikurinn fer fram á Mestalla heimavelli Valencia en stórsöngvarinn Geir Ólafsson verður á vellinum.
,,Ég er svo heppinn að unnusta mín býr þannig að hún fær frímiða á alla leiki Real Madrid. Ég fæ að fara á leikinn í kvöld og hlakka mikið til," sagði Geir í Skype símtali við Fótbolta.net í dag frá Benidorm.
,,Auðvitað er eftirsjá að sjálfur Ronaldo sé ekki með en liðið er það gott að það kemur með önnur gæði í staðinn."
,,Barcelona hefur ekki verið að gera jafngóða hluti undanfarið og þeir gætu bjargað tímabilinu í kvöld. Þetta verður mjög góður leikur. Ég vona að Real Madrid vinni en ég er hræddur um að Barcelona vinni 2-0."
Geir hefur verið fastagestur á leikjum Real Madrid í vetur en hann sá leik liðsins gegn Barcelona á dögunum þar sem Börsungar höfðu betur 2-1.
Í viðtalinu hér að ofan má sjá Geir tjá sig um þá upplifun.
Athugasemdir