Markvörðurinn Ingvar Kale gekk í raðir Vals í vetur en hann gat ekki komið í veg fyrir 5-1 tap liðsins gegn sterku liði Breiðabliks í 8-liða úrslitum Lengjubikarsins í kvöld. Blikar mæta Víkingi í undanúrslitum á sunnudag.
„Við vorum á hælunum í þessum leik, sérstaklega í seinni hálfleik. Það verður að hrósa Blikunum fyrir flottan leik. Við getum ekkert afsakað okkur, þeir komust í gegnum vörnina okkar trekk í trekk," sagði Kale eftir leikinn.
„Sem betur fer var þetta ekki fyrsti leikur í Íslandsmóti. Það gerist stundum að maður tapar illa, við rífum okkur úr þessu enda með gott lið."
Ólafur Jóhannesson, þjálfari Vals, sagði í viðtali í dag að Valsmenn væru ekki líklegir til að berjast um efstu fjögur sætin eins og staðan er í dag.
„Við erum með okkar markmið og tökum einn leik í einu. Ég hef alltaf ætlað mér stóra hluti í liðum sem ég er í og yfirleitt hefur gengið vel. Ég sé ekki af hverju við ættum ekki að vera í toppbaráttunni," sagði Kale en viðtalið má sjá í heild í sjónvarpinu hér að ofan.
Athugasemdir