Guardiola tókst eins og áður segir að fullkomna taktíkina Tiki-Taka en spænska liðið vann ófáa titla á því tímabili.

Liðið vann deildina þrisvar og Meistaradeildina tvisvar en svo virðist sem að Tiki-Taka sé að deyja út og að lið séu nú þegar komin með svör við taktíkinni.

Guardiola segist þó ekki sammála því að hann hafi spilað Tiki-taka og að sú taktík snúist einungis um að senda boltann.

,,Ég fæ upp í kok við tilhugsunina um Tiki-taka. Halda boltanum svona, þetta er svo mikil vitleysa og þjónar engum tilgangi. Þú verður að spila boltanum með þeim ásetningi að koma boltanum í netið. Þetta snýst ekki um sendingar í guðanna bænum," sagði Guardiola.

,,Þið verðið að finna ykkar eigið DNA í þessu. Skilgreiningin á Tiki-Taka er að senda boltann og ekkert meira en það. Þetta er tilgangslaust."

,,Barca spilaði ekki Tiki-taka, það er kjaftæði. Ekki trúa þessu bulli. Í öllum liðsíþróttum þá er það þannig að annað liðið keyrir á andstæðinginn þannig að liðið neyðist til þess að verjast. Maður keyrir á annan vænginn og dregur andstæðinginn þangað á meðan hinn vængurinn er illa mannaður."

,,Þegar maður er búinn að því þá keyrum við í sókn og skorum á hinum vængnum. Þess vegna verður þú að spila boltanum en þó aðeins ef það er ásetningurinn. Þetta snerist um að keyra yfir andstæðinginn, draga hann að þér og koma þeim á óvart. Þannig verður leikurinn að vera og það hefur ekkert með Tiki-taka að gera," sagði hann að lokum.