Arna Sif Ásgrímsdóttir og Berglind Björg Þorvaldsdóttir eru að reyna að losna frá ítalska félaginu Verona eftir að það stóð ekki við samninga. Morgunblaðið greinir frá þessu í dag.
Arna og Berglind gengu í raðir Verona í haust en þær fóru ekki aftur út til Ítalíu eftir jólafrí í deildinni. Þær eru staddar á Íslandi og er útlit fyrir að þær spili að nýju í Pepsi-deildinni næsta sumar.
Arna vildi ekki tjá sig um deiluna í samtali við Morgunblaðið en vísaði á Leikmannasamtök Íslands, sem berjast fyrir rétti leikmannanna í samstarfi við leikmannasamtök á Ítalíu og umboðsmann landsliðskvennanna tveggja.
„Það liggur alveg ljóst fyrir að það er búið að brjóta samninga við þær í bak og fyrir, og það er bara verið að reyna að finna lausn á því hvernig hægt er að leysa þetta,“ segir Kristinn Björgúlfsson, framkvæmdastjóri Leikmannasamtaka Íslands, við Morgunblaðið.
„Brotin felast meðal annars í því að launagreiðslur hafa borist seint, húsnæði var útvegað seint auk þess sem það var engan veginn íbúðarhæft, og fleira. Vandamálið er kannski að það sem okkur finnst í lagi finnst þeim ekki í lagi.“
Berglind lék með Breiðablki síðastliðið sumar áður en hún fór til Verona. Arna Sif lék aftur á móti með Val síðastliðið sumar.
Athugasemdir