Fjórir leikir eru búnir í þýsku Bundesligunni. Augsburg spilaði án Alfreðs Finnbogasonar, sem hefur verið meiddur, þegar liðið tapaði fyrir Werder Bremen þar sem Aron Jóhannsson byrjaði útaf en kom inn á í lokin fyrir markaskorarann Ishak Belfodil.

Gestirnir í Bremen voru 0-2 yfir í hálfleik en Rani Khedira minnkaði muninn á 63. mínútu fyrir Augsburg.

Max Kruse kom forskoti gestanna aftur í tvö mörk þegar hann skoraði þriðja mark liðsins á 83. mínútu.

Werder Bremen er eftir leikinn í 12.sæti með 33 stig, aðeins tveimur stigum á eftir Augsburg sem situr í 9. sæti.

Borussia Mönchengladbach tók á móti liði Hoffenheim. Leikurinn var fjörlegur og mörg mörk skoruð. Staðan var 1-1 í hálfleik. Í seinni hálfleik kom Andrej Kramaric gestunum yfir úr víti. Á 72. mínútu jafnaði Lars Stindl en aðeins mínútu síðar kom Florian Grillitsch gestunum aftur yfir.

Heimamenn áttu þó síðasta orðið þegar Matthias Ginter jafnaði í lokin.

Hoffenheim situr í 7.sæti deildarinnar með 39 stig. Tveimur sætum og þremur stigum neðar er Borussa Mönchengladbach.

Í Frankfurt gerðu heimamenn í Eintracht Frankfurt út um sinn leik gegn Mainz í fyrri hálfleik. Staðan var 3-0 í hálfleik.

Frankfurt er eftir sigurinn í 4.sæti deildarinnar í Meistaradeildarbaráttu. Mainz er hinsvegar í fallsæti.

Í Hamburg fékk fallbaráttuliðið Hamburger SV heimsókn úr höfuðborginni þegar Hertha Berlin mætti.

Heimamenn komust yfir eftir 25 mínútur með marki frá Douglas Santos og voru yfir í hálfleik.

Gestirnir rönkuðu við sér í hálfleik og skoruðu Valentino Lazaro og Salomon Kalou sitt markið hvor.

Hamburger er í vondum málum í næst neðsta sæti deildarinnar en Hertha Berlin siglir lygnan sjó í 11.sæti deildarinnar.