Paul Cook, knattspyrnustjóri Wigan Athletic, er kominn með lið sitt í 8-liða úrslit bikarsins þar sem lærisveinar hans munu spila gegn Southampton á morgun á heimavelli sínum, DW Stadium.
Þjálfaraferill Cook hefur þó ekki alltaf verið dans á rósum, langt því frá.
Þegar Cook var 39 ára, árið 2007, var hann atvinnulaus eftir að hafa verið rekinn frá utandeildarliði Southport eftir aðeins 25 leiki í starfi.
Formaður félagsins fékk hann til að hitta sig í verksmiðjunni sinni. Þar var Cook rekinn úr sínu fyrsta knattspyrnustjórastarfi.
Síðan þá hefur hann gert fína hluti og þar á meðal komið Chesterfield og Portsmouth upp um deildir.
Í ár er hann í baráttu með lið sitt um að komast upp í Championship-deildina, þá næst efstu á Englandi, og hefur slegið þrjú úrvalsdeildarlið úr bikarnum - Bournemouth, West Ham og verðandi Englandsmeistara Manchester City.
Athugasemdir