„Hvað eigum við að gera við 9. sæti? Við vorum þarna í fyrra og árið þar á undan. Það er ekki gaman að vera í 9. sæti, það er fullt af töpum ef þú endar þar," segir Sindri og Atli bætir við:

„Er ekki klisjan sú að maður verði að gera betur en í fyrra? Við enduðum í níunda sæti í fyrra og verðum að reyna að gera betur en það."

„Þessi spá kemur samt alls ekki á óvart. Það hafa orðið miklar breytingar á liðinu og enginn veit hvað mun koma frá okkur, nema við sjálfir," segir Sindri.

Eins og oft áður í Vestmannaeyjum hefur hópurinn verið nokkuð sundraður í vetur og erfitt að rýna í getu liðsins. Hópurinn er nýkominn úr æfingaferð og segja Atli og Sindri að mynd sé að komast á þetta.

Þeir tveir eru búsettir á Reykjavíkursvæðinu yfir vetrartímann, hafa verið að æfa með Haukum á virkum dögum en farið svo til Eyja um helgar á æfingar.

„Við erum farnir að kunna ansi vel við okkur í Haukunum," segir Atli.

Hlustaðu á viðtalið í heild í spilaranum hér að ofan en þar kemur Herjólfur, hárgreiðsla Sindra, körfubolti og fleira við sögu.