Í eina leik dagsins í ítölsku úrvalsdeildinni mættust Inter og Cagliari en þar voru fjögur mörk skoruð.

Heimamenn í Inter áttu ekki í neinum vandræðum með gestina í Cagliari og sigruðu 4-0.

Eina mark fyrri hálfleiks skoraði Joao Cancelo á 3. mínútu. Mauro Icardi skoraði annað mark heimamanna í upphafi seinni hálfleik og 11. mínútum síðar skoraði Marcelo Brozovic þriðja markið.

Ivan Perisic skoraði fjórða markið á 90. mínútu og öruggur 4-0 sigur Inter staðreynd.

Inter fer upp fyrir Roma og Lazio og er í þriðja sæti deildarinnar en Roma og Lazio geta aftur komist upp fyrir Inter með sigri á morgun en níu leikir eru á dagskrá ítölsku úrvalsdeildarinnar á morgun.