Halldór Orri Björnsson, markaskorari FH í kvöld var svekktur með úrslit leiksins gegn Braga í forkeppni Evrópudeildarinnar í kvöld. Braga vann leikinn 2-1.

„Þetta voru gríðarlega svekkjandi úrslit. Mér fannst við spila ágætlega og gefa þeim góðan leik. Það var virkilega svekkjandi að fá á sig tvö mörk í seinni hálfleiki," sagði Halldór.

Halldór var ánægður með fyrri hálfleik FH í kvöld en viðurkennir að Braga hafi verið sterkari í þeim síðari.

„Við byrjuðum fyrri hálfleikinn mjög vel fannst mér. Við komum grimmir eins og við töluðum um og svo var draumur að ná þessu marki. Það gaf okkur auka boost og þeir voru pirraðir fannst mér. En svo koma þeir frekar öflugir út í seinni hálfleikinn og voru að skapa hættuleg færi."

Eins og áður segir skoraði Halldór eina mark FH í leiknum í kvöld.

„Lenny (Steven Lennon) skipti honum frábærlega yfir frá hægri til vinstri. Boltinn datt vel fyrir mig og ég náði að checka inn og smellhitta hann. Það var mjög sætt að sjá hann liggja í markinu."

Bæði mörk Braga komu eftir mistök í varnarleik Íslandsmeistaranna.

„Þetta var virkilega svekkjandi að fá þessi mörk á sig því mér fannst við eiga meira skilið úr þessum leik. En svona er fótboltinn og það eru 90 mínútur eftir í þessu og við förum afslappaðir út í seinni leikinn og gerum okkar besta. Það er klárlega möguleiki á að fara áfram."

FH seldi Kristján Flóka í gær til norska félagsins Start. Halldór segir það hafa komið eitthvað á óvart.

„Já í rauninni kom það okkur í opna skjöldu. Við heyrðum af þessu í gærkvöldi en þetta er frábært tækifæri fyrir Flóka og ég óska honum góðs gengis."