Ólafur Jóhannesson var að sjálfsögðu hress og kátur eftir að Valur innsiglaði Íslandsmeistaratitil sinn í kvöld.
Valsmenn hafa unnið titil á hverju ári síðan Óli tók við, bikarmeistarar tvö ár í röð og tóku svo þann stóra núna.
Valsmenn hafa unnið titil á hverju ári síðan Óli tók við, bikarmeistarar tvö ár í röð og tóku svo þann stóra núna.
Lestu um leikinn: Valur 4 - 1 Fjölnir
„Við spiluðum flottan leik í kvöld. Við höfum verið með góða forystu í langan tíma. Við fórum yfir það í vikunni að við skulduðum alvöru Vals-frammistöðu og ég held að hún hafi komið í dag," sagði Óli.
Hann var ekki nægilega sáttur við spilamennskuna í síðustu leikjum þrátt fyrir að stig hafi komið í hús en í kvöld sýndu Valsmenn sínar bestu hliðar.
„Við Bjössi erum búnir að gera ágætt hérna. Við sögðum fyrir hin tvö árin að við værum ekki 100% klárir í að vinna mótið. Nú sögðum við fyrir þetta mót að við værum með lið til að fara alla leið."
„Góð liðsheild er okkar aðalsmerki. Það er staðið þvílíkt á bak við okkur af þeim sem stjórna hjá Val og við fáum nánast allt sem við viljum. Við leggjum mikið upp úr liðsheildinni og hún snýst líka um vinnu þeirra sem eru í kringum okkur. Það hefur verið gert frábærlega."
Þú verður hérna áfram á næsta tímabili er það ekki?
„Þetta tímabil er ekki búið, við þurfum að klára það fyrst... jú ég tel það nú líklegt að ég verði hérna áfram. Samt veit maður aldrei hvað gerist í þessu."
Er þá ekki bara stefnan að taka tvöfalt á næsta ári?
„Við skulum klára þetta ár og svo skal ég setjast niður með þér í marga daga og tala um fótbolta," sagði Óli brosandi.
Athugasemdir