„Þetta leggst mjög vel í mig. Þetta er mjög gaman,” sagði Selma Sól Magnúsdóttir, nýliðinn í íslenska landsliðshópnum sem mættur er á meginlandið til að spila tvo mikilvæga leiki í undankeppni HM.
Selma Sól er í A-landsliðshópnum í fyrsta sinn. Átti hún von á að vera valin í verkefnið?
„Ég átti ekki beint von á að fá kallið en ég vissi að ég væri á einhverjum backup lista og ég vissi að ég ætti einhvern séns. En það var síðan mjög gaman að fá að vita þetta.“
Aðspurð um dagana frá landsliðsvalinu svaraði Selma Sól:
„Þeir hafa verið mjög fljótir að líða. Það er mikið að gera í skólanum og svo er ég komin hingað. Allt gengur vel og allir taka vel á móti manni.“
Selma Sól hefur spilað fjölda landsleikja með U17 og U19 og við spurðum hana út í muninn á verkefnunum.
„Það er náttúrlega bara ákveðinn aldurshópur sem er leyfilegur í U17 og U19 en hérna er allur aldurshópur leyfður þannig að það er hærra tempó á æfingum. Svo er ég náttúrlega ekki búin að spila neinn leik en það ætti mögulega að vera meira tempó í leikjunum líka.“
„Mér finnst maður frjálslegri hér. Þú ert fullorðinn og ert svona meira á eigin vegum eða næstum því. Það er svona mesti munurinn.“
Framundan eru risaleikir við Þýskaland og Tékkland og Selma Sól er spennt fyrir þeim.
„Þetta er mjög gaman, mjög stórir leikir og við ætlum að gera okkar allra besta til að ná sem lengst í þessum riðili. Ég er bara mjög spennt fyrir þessu,“ sagði Selma Sól sem hefur mætt báðum þjóðum í leikjum með unglingalandsliðunum.
„Við erum búin að mæta Þýskalandi þrisvar sinnum held ég í U17 og U19 og þær eru mjög góðar. Ég held ég hafi mætt Tékklandi einu sinni og þær eru líka bara mjög sterkar.“
Hægt er að horfa á allt viðtalið við leikmanninn efnilega í spilaranum hér að ofan.
Athugasemdir