Ómar Jóhannsson.
Markvörðurinn reyndi Ómar Jóhannsson mun ekki leika með Keflvíkingum í Pepsi-deildinni í sumar. Ómar hefur verið að glíma við erfið axlarmeiðsli sem héldu honum frá keppni síðastliðið sumar og ljóst er að þau munu koma í veg fyrir þátttöku hans í sumar.
,,Það eru einhverjar skemmdir í beini sem þýða að þarf að fara í aðgerð einu sinni enn og þá stærri aðgerð en ég hef farið í áður," sagði Ómar við Fótbolta.net í dag.
,,Sérfræðingar hafa sagt mér að ég megi láta reyna á þetta en þegar maður hefur farið oft úr axlarlið þá er takmarkað hvað maður getur staðið lengi í því."
Ómar er 32 ára gamall en hann hefur verið markvörður Keflvíkinga undanfarin ár. Hann segist stefna á að koma aftur á fótboltavöllinn á næsta ári.
,,Þetta er engin dramatík. Ég er ekki hættur í fótbolta en ég hef fengið leyfi hjá Keflavík til að stíga frá liðinu í bili og skoða önnur verkefni," sagði Ómar sem ætlar að koma að fótboltanum í sumar.
,,Það er erfitt að gera ekki neitt. Ég er að þjálfa aðeins yngri flokkana hjá Keflavík og vonast til að bæta við einhverjum meistaraflokks verkefnum með því. Það væri spennandi að koma að markmannsþjálfun hjá meistaraflokknum. Maður finnur sér eitthvað að gera."
Markverðirnir ungu Sindri Kristinn Ólafsson, Árni Freyr Ásgeirsson og Bergsteinn Magnússon hafa staðið vaktina í Fótbolta.net mótinu og Lengjubikarnum hjá Keflvíkingum að undanförnu en í fyrra stóð enski markvörðurinn David Preece á milli stanganna hjá liðinu fyrri hluta móts.
Athugasemdir
