Sex leikir fara fram í Seria A í dag. Í hádegisleik dagsins verður borgarslagur þar sem Ítalíumeistararnir í Juventus mæta á Stadio Olimpico Grande Torino og spila gegn heimamönnum í Torino.

Klukkan 14:00 hefjast þrír leikir. Neðsta lið deildarinnar, Benevento, tekur á móti Crotone, sem er fjórum stigum fyrir ofan fallsæti.

Bologna tekur þá á móti Sassuolo. Bæði lið eru í neðri hluta töflunnar en þó í nokkuð þægilegri fjarlægð frá fallsætunum.

Napoli, sem situr í efsta sæti deildarinnar, tekur á móti SPAL 2013, sem situr í fallsæti með 17 stig og er fjórum stigum frá öruggu sæti.

Klukkan 17:00 tekur Atalanta á móti Fiorentina. Heimamenn eru í baráttu um Evrópudeildarsæti en gestirnir sitja um miðja deild.

Síðasti leikur dagsins hefst klukkan 19:45 þegar AC Milan fær Sampdoria í heimsókn á San Siro. Hið fornfræga lið AC Milan situr í 7.sæti deildarinnar með 38 stig. Þremur stigum og einu sæti ofar sitja gestirnir. Það er því mikið í húfi í leik kvöldsins.