„Þetta var fínn leikur, ágætis tempó og við héldum boltanum vel og sérstaklega framan af leiknum. Ég er ánægður með okkar menn ," sagði Ólafur Páll Snorrason aðstoðarþjálfari FH eftir 2-3 sigur liðsins á Keflavík í Lengjubikarnum í dag en nokkur læti voru milli leikmanna liðanna á köflum.
Lestu um leikinn: Keflavík 2 - 3 FH
„Það er oft þannig á móti Keflavík að það verða læti. Það eru alvöru karlmenn í Keflavík, en það er bara eins og við bjuggumst við, læti og erfiður leikur."
Ólafur Páll sagði eins og Heimir Guðjónsson þjálfari liðsins hefur sagt nokkrum sinnum í vetur að félagið sé að leita að fleiri leikmönnum.
„Við erum hægt og rólega að fá menn aftur úr meiðslum og annað en við leynum því ekki að við viljum styrkja hópinn og erum enn í því ferli að reyna að fá til okkar leikmenn. Það hefur ekki gengið nógu vel hingað til svo við höldum því áfram."
Bjarni Þór Viðarsson hefur ekkert spilað með FH á undirbúningstímabilinu og Ólafur Páll segir óvíst hvenær hann verður klár að nýju.
„Ég þori ekki að fara með það. Bjarni er að stíga upp úr erfiðum meiðslum og fór í aðgerð í haust. Ég vona innilega að hann verði klár á þeim tíma sem við þurfum á honum að halda sem er í lok apríl en ég veit það ekki nákvæmlega."
Athugasemdir