Dries Mertens skoraði tvö og lagði eitt upp í gífurlega mikilvægum sigri Napoli á Cesena í kvöld.

Napoli þurfti sigur til að halda sér í meistaradeildarbaráttunni ásamt Roma og Lazio sem eru þremur og fjórum stigum ofar þegar tvær umferðir eru eftir.

Heimamenn stjórnuðu ferðinni í leiknum en gestirnir, sem voru fallnir úr deildinni fyrir leikinn, voru hættulegir og komust yfir með glæsilegu langskoti frá Gregoire Defrel eftir korter af leiknum.

Belginn Mertens var ekki lengi að jafna leikinn og leggja svo upp mark fyrir Manolo Gabbiadini til að koma sínum mönnum yfir.

Defrel var svo aftur á ferðinni þegar hann jafnaði leikinn í 2-2 undir lok fyrri hálfleiks. Það var þó Mertens sem átti lokaorðið í leiknum þegar hann skoraði síðasta markið snemma í síðari hálfleik.