Ólafur Páll Snorrason, aðstoðarþjálfari FH, ræddi við Fótbolta.net eftir sigurinn örugga gegn Sindra í kvöld.
Lestu um leikinn: FH 6 - 1 Sindri
„Við vissum kannski að leikurinn myndi þróast svona, fyrst og fremst þurftum við að vera klárir í að gera hlutina almennilega. Þegar fyrsta markið kom þá var ekkert hægt að snúa til baka," segir Ólafur.
Hann og Heimir Guðjónsson hentu hinum sextán ára Einari Erni Harðarsyni í byrjunarliðið.
„Ungu strákarnir þurfa að fá einhverja eldskírn í þessu. Við mátum sem svo að þetta væri tækifæri fyrir Einar að spila og hann stóð sig vel."
Maður leiksins var varnarmaðurinn Kassim Doumbia sem lék sinn fyrsta byrjunarliðsleik í sumar. Kassim tók virkan þátt í sóknarleik FH gegn Sindramönnum sem láu vel til baka og skoraði Kassim tvö mörk.
„Ég held að Kassim hafi stolið leikboltanum. Hann hélt að hann hefði skorað þrennu. Hann er öflugur í teignum eins og í fyrsta markinu. Hann naut sín í kvöld og fínt fyrir hann að fá leik eftir meiðslin," segir Ólafur Páll Snorrason.
Viðtalið má sjá í heild í sjónvarpinu hér að ofan.
Athugasemdir