Grétar Sigfinnur Sigurðarson, leikmaður Þróttar R. í Inkasso-deildinni, var í skýjunum með 2-1 sigur liðsins á HK í 17. umferð deildarinnar í kvöld. Liðið er nú í öðru sæti deildarinnar.
Lestu um leikinn: Þróttur R. 2 - 1 HK
Þróttur lenti undir í leiknum er Brynjar Jónasson skoraði en Rafn Andri Haraldsson og Viktor Jónsson sáu til þess að Þróttur færi heim með öll stigin.
„Ég vil alls ekki kalla þetta iðnaðarsigur. Þetta var kaflaskiptur leikur, við vildum ekki fá þetta mark á okkur þarna. Ég verð að hrósa Gregg fyrir vel uppsettan leik þar sem við ætluðum að fara fyrir aftan það, nema við fengum mark á okkur og það var klúður hjá liðsheildinni," sagði Grétar við Fótbolta.net.
„Uppleggið í vikunni var að spila milli lína og brjóta þá upp. Það hlustuðu allir og seinni hálfleikur var langbesti leikurinn hjá okkur í sumar. Mér fannst við geta skorað fullt af mörkum, komu bara tvö, en frábær sigur og ótrúlega flott að vera komnir í annað sætið."
Viktor Jónsson skoraði annað mark Þróttara en margir vildu meina að hann hefði brotið af sér í aðdragandanum.
„Ég get ekki tjáð mig um það. Ég sá það ekki nógu vel, hvort sem hann braut af sér eða ekki þá fannst mér við eiga þetta skilið þar sem við vorum búnir að liggja í færum. Það hlaut að detta, ef við hefðum ekki skorað þarna þá hefðum við bara skorað annað."
Liðið tapaði fyrir Keflavík í síðustu umferð en menn voru allir sammála um það í vikunni að rífa liðið í gang og það virðist hafa tekist.
„Við þurftum að fara út á dekkjarverkstæði eftir síðasta leik, tapið gegn Keflavík og gíra okkur upp í sigur. Koma á heimavöll þar sem við viljum ekki tapa einu einasta stigi," sagði hann í lokin.
Athugasemdir
