Mourinho vildi fá fjóra nýja leikmenn í hópinn í sumar en þeir Romelu Lukaku, Nemanja Matic og Victor Lindelof eru komnir til félagsins á samtals 150 milljónir punda.

Aðspurður hvort hann reikni með fleiri leikmönnum sagði Mourinho: „Ég held ekki. Ekki nema eitthvað gerist sem lætur okkur fara aftur á markaðinn."

Ed Woodward, framkvæmdastjóri United, hefur fengið þau skilaboð frá Mourinho að það sé ekkert stress á að landa fjórða leikmanninum í sumar.

„Ég sagði Herra Woodward að áætlun mín hefði auðvitað verið að fá fjóra menn. Ég sagði líka við hann 'vertu rólegur, það er engin pressa frá mér. Gerðu það sem þú telur að sé best fyrir félagið."

„Við eigum aftur félagaskiptaglugga í janúar og næsta sumar og það er engin pressa frá mér. Ég er ánægður með hópinn sem við höfum og er tilbúinn í slaginn án þess að fá fjórða leikmanninn. Ef við erum hættir á markaðinum þá er ég góður. Ég er klár."