„Þetta eru mjög spennandi og skemmtileg verkefni. Nú reynir virkilega á okkur,“ sagði landsliðsþjálfarinn Freyr Alexandersson þegar Fótbolti.net náði tali af honum. Framundan eru erfiðir útileikir gegn Þýskalandi og Tékklandi í undankeppni Heimsmeistaramótsins. Fyrri leikurinn er gegn Þýskalandi í Wiesbaden á föstudag og sá seinni gegn Tékkum þriðjudaginn 24. október.
„Það gerist ekki oft að maður mæti liðum með þau gæði sem þýska liðið hefur en tékkneska liðið er líka mjög sterkt þannig að báðir leikir verða erfiðir. Þeir verða ólíkir að því leytinu til að við verðum aðeins meira með boltann á móti Tékkum. Örugglega 50/50 með boltann en bara 30% með boltann á móti Þjóðverjunum.“
Þýskaland þótti sigurstranglegast á Evrópumótinu síðastliðið sumar enda unnið síðustu sex Evrópumót en féll óvænt úr leik gegn Dönum í 8-liða úrslitum. Þjóðverjar fengu í kjölfarið þónokkra gagnrýni en frammistaða liðsins var heilt yfir góð þó þær hafi ekki komist lengra á mótinu.
„Taktískt séð voru þær mjög góðar. Halda boltanum vel og skapa sér fullt af færum. Tölfræðilega hefðu þær átt að vinna Danina og fara lengra. Danirnir voru klókir, höfðu trú á verkefninu sínu og slógu þær þannig út. Þetta datt líka aðeins með þeim og Þjóðverjarnir voru óheppnir,“ sagði Freyr sem hefur fylgst vel með þýska liðinu.
Þónokkuð hefur verið talað um kynslóðaskipti hjá liðinu en Freyr vill ekki meina að það veiki þær þó að gömlu kempurnar séu margar hverjar horfnar á braut og yngri leikmenn farnar að leika stærri hlutverk.
„Allir leikmenn í 25 manna hópi Þýskalands eru búnir að spila yfir 50 yngri landsleiki og langflestar komnar í tuttugu plús landsleiki með A-landsliðinu. Svo eru allar þessar helstu komnar nálægt 100 leikjum. Það er ekki eins og þær séu reynslulausar en það er rétt að það hafa orðið kynslóðaskipti og það er kominn nýr þjálfari sem hefur töluverð áhrif.“
Aðspurður um ástandið á leikmannahópnum var Freyr jákvæður.
„Engin meiðsli eða neitt svoleiðis í gangi. Ég trúi ekki öðru en að allar verði klárar á föstudaginn, 100%.“
Nánar er rætt við landsliðsþjálfarann í spilaranum hér að ofan.
Athugasemdir