Það vakti athygli að þýski landsliðshópurinn var mættur í útihlaup um Wiesbadenborg í morgun. Liðsstjórar og sjúkraþjálfari íslenska landsliðsins voru í sína daglega morgunskokki þegar þær mættu þeim þýsku undir dyggri stjórn aðstoðarþjálfara liðsins.
Einhverjir myndu tala um gamla skólann þarna en það er ekki algengt að landslið séu mikið í útihlaupum saman svo stuttu fyrir mikilvæga leiki. Þjóðverjar eru þó þekktir fyrir mikið æfingaálag og Guðbjörg Gunnarsdóttir sagði einmitt frá því í viðtali hér á síðunni í gær að hún hefði stundum æft þrisvar á dag þegar hún var á mála hjá Turbine Potsdam.
Gugga um Þýskaland: Hægt að velja tíu góð landslið
Á sama tíma og þær þýsku hlupu var íslenska landsliðið á leið í morgunmat og að undirbúa sig fyrir æfingu dagsins sem var öllu knattspyrnumiðaðri.
Leikmenn byrjuðu á liðkandi og meiðsla fyrirbyggjandi æfingum undir stjórn Ástu Árnadóttur sjúkraþjálfara og einbeittu sér svo að leikfræðinni með þjálfurunum Frey Alexanderssyni og Ásmundi Haraldssyni. Ólafur Pétursson var svo auðvitað á sínum stað með markverðina sem fengu sína sérþjálfun.
Það verður fróðlegt að sjá hvernig þessi þjálfunaraðferð Steffi Jones skilar sér en þýsku landsliðskonurnar mæta stelpunum okkar á föstudag kl.14:00 að íslenskum tíma.
Athugasemdir