Klaus Allofs, yfirmaður íþróttamála hjá þýska úrvalsdeildarliðinu Wolfsburg, segir félagið ekki vera í stakk búið til að keppa við Bayern Munchen.
Bayern er á toppi Bundesligunnar og á enn eftir að tapa leik í deildinni á þessu tímabili.
„Þú vonast alltaf til að geta keppt við forystusauðina en ég held að það sé ekki raunhæft að stefna að því," segir Allofs.
Wolfsburg endaði í 2.sæti Bundesligunnar í fyrra en liðið seldi Kevin de Bruyne og Ivan Perisic í sumar og fékk í staðinn Julian Draxler frá Schalke.
„Eftir silfrið í fyrra og sigur í Super Cup í upphafi leiktíðar sögðu einhverjir að við værum alvöru keppinautur við Bayern Munchen en við höfum sagt að við séum ekki tilbúnir í það."
„Það hefur sýnt sig og við erum ekki að keppa við þá," segir Allofs.
Wolfsburg er í þriðja sæti deildarinnar, þrettán stigum á eftir topplið Bayern.
Athugasemdir