Í lok móts var Pontus dæmdur í eins leiks bann hjá aga- og úrskurðarnefnd fyrir orð sem hann lét falla inni á vellinum eftir 2-1 tap gegn Fylki í Pepsi-deildinni. Atvikið var sýnt í Pepsi-mörkunum á Stöð 2 Sport.

„Spurðu þá hvað þeir borguðu dómaranum. Guð minn góður. Þú hlýtur að sjá þetta,“ sagði Pontus í myndavélina og benti á Fylkismenn sem voru að fagna sigrinum. Ólsarar voru mjög óánægðir með Pétur Guðmundsson dómara leiksins. Ólsarar fengu tvær vítaspyrnur á sig í leiknum gegn Fylki en þeir voru sjálfir mjög ósáttir við að fá ekki vítaspyrnu í leiknum.

Ólafsvíkingar áfrýjuðu banninu og það gerði það að verkum að Pontus gat spilað gegn Stjörnunni í lokaumferð Pepsi-deildarinnar. Áfrýjunardómstóll fór síðan yfir málið og ákvað að draga bannið til baka.